BETA
BETA
Դուք Հայաստանում եք մեզ համար շատ դժվար ժամանակաշրջանում․ Արման Եղոյանն ընդունել է հույն պատգամավորներին
Եվրոպական ինտեգրման հարցերի մշտական հանձնաժողովի նախագահ Արման Եղոյանը նոյեմբերի 28-ին հանդիպել է Հունաստանի խորհրդարանի պատգամավորներ Պերիկլիս Մանտասի, Անաստասիոս Բարձոկասի, Կոնստանտինոս Զախարիադիսի հետ։ Հանդիպմանը մասնակցել են Եվրոպական ինտեգրման հարցերի մշտական հանձնաժողովի անդամներ Սոնա Ղազարյանը եւ Արսեն Թորոսյանը:
Այս մասին տեղեկացնում է ՀՀ ԱԺ կայքը։
«Դուք Հայաստանում եք մեզ համար շատ դժվար ժամանակաշրջանում: Հայաստանը կանգնած է տարածաշրջանային մարտահրավերների առջեւ»,-ողջունելով Հունաստանի խորհրդարանի պատգամավորներին ասել է Արման Եղոյանը:
Արման Եղոյանը ներկայացրել է իրավիճակը Հայաստանում եւ Արցախում, անդրադարձել սահմանային լարվածությանը, խոսել Հայաստան-Թուրքիա հարաբերությունների կարգավորման գործընթացից: Նա կարեւորել է աշխարհաքաղաքական դժվարին ժամանակներում սերտ եւ արդյունավետ փոխհարաբերությունների զարգացման անհրաժեշտությունը:
Պերիկլիս Մանտասը, շնորհակալություն հայտնելով ջերմ ընդունելության համար, նույնպես կարեւորել է Հայաստանի հետ հարաբերությունների սերտացումը:
Հունաստանի խորհրդարանի պատգամավորները մասնակցելու են «ՀՀ Ազգային ժողովի կարողությունների ուժեղացում` ՀԸԳՀ վերահսկողության ու կիրարկման հետագա աջակցության համար» Թվինինգ ծրագրի փակման արարողությանը: Հանձնաժողովի նախագահը, գնահատելով ծրագրի շրջանակում իրականացված աշխատանքները, հույս է հայտնել, որ համագործակցությունը շարունակական կլինի:
Քննարկվել են նաեւ տնտեսական, գործարար կապերին վերաբերող հարցեր:
